تلنگانہ میں آئندہ دنوں کے دوران شدید بارش کا امکان ظاہر کیا جارہا ہے۔ محکمہ موسمیات نے تازہ الرٹ جاری کیا ہے۔ عہدیداروں کے مطابق حیدرآباد اور آس پاس کے علاقوں میں اگلے 3 دنوں تک شدید بارش کی پیش قیاسی کی ہے۔ جس کے بعد انتظامیہ کو کسی بھی ہنگامہ صورتحال سے نمٹنے کےلیے تیار رہنے کی ہدایت دی گئی ہے۔ انتظامیہ نے محکمہ موسمیات کی پیش قیاسی کے مدنظر عوام کو گھروں میں ہی رہنے کا مشورہ دیا ہے اور عوام کو برقی کھمبوں سے بھی دور رہنے کی ہدایت دی۔
حیدرآباد کے حسین ساگر جھیل میں پانی کی سطح میں زبردست اضافہ دیکھا گیا۔ حسین ساگر میں پانی فی الحال پانی سطح 513.84 میٹر ہے جبکہ جملہ گنجائش 513.41 میٹر ہے۔ جی ایچ ایم سی عہدیداروں نے جھیل سے پانی کا اخراج کرنا شروع کردیا ہے اور حالات پر گہری نظر رکھی جارہی ہے۔
اس دوران تلنگانہ حکومت نے حیدرآباد میں بارش سے متاثرہ علاقوں میں عام زندگی کی بحالی کےلیے راحتی اقدامات میں تیزی لانے کا منصوبہ بنایا ہے تاہم اضافی افرادی طاقت کے علاوہ مشینوں کو راحت کاری کے کاموں میں استعمال کیا جائے گا۔ سڑکوں پر جمع پانی کو ہٹانے، سڑکوں، گلیوں اور نالوں سے کچرے کی نکاسی کے لیے خصوصی مہم شروع کی گئی۔
وزیر بلدی نظم و نسق و شہری ترقی کے تارک راما راؤ کی ہدایت کے بعد جی ایچ ایم سی نے بڑے پیمانہ پر شہر میں بلیچنگ پاوڈر، سوسڈیم ہائیپوکلورائیڈ، کیڑے و جراثیم کش ادویات کے چھڑکاؤ کا آغاز کیا ہے۔
ریاست تلنگانہ کے مختلف علاقوں میں شدید بارش کا سلسلہ جاری ہے جبکہ حیدرآباد میں موسلادھار بارش کے باعث سیلاب جیسی صورتحال ہے۔ گذشتہ روز ہوئی شدید بارش کے بعد بالاپور میں واقع گرم چیرو تالاب کا پشتہ ٹوٹنے کی وجہ سے بابانگر، عمر کالونی کے علاوہ اطراف و اکناف کے سینکڑوں مکانات میں پانی داخل ہوگیا اور علاقہ میں تقریباً 6 فٹ تک پانی جمع ہوگیا تھا۔
