ریاست تلنگانہ کے وزیر اعلی کے چندر شیکھرراو نے امکان ظاہر کیا ہے کہ 24 اپریل تک ریاست تلنگانہ کورونا سے پاک ہو جائے گا۔ تاہم لاک ڈاون کو احتیاطی طور پر توسیع کر دی گئی ہے تاکہ اس وائرس کو پھیلنے سے روکا جا سکے۔ اس لاک ڈاؤن پر سختی سے عمل کیا جائے گا۔
وزیر اعلی نے کہا کہ ریاست میں اس وائرس سے 14 اموات ہوئی ہیں اور ریاست میں اس سے متاثر ہونے والوں کی تعداد 393 ہے۔ انہوں نے کہا کہ 96 افراد کو ہسپتال سے گھر جانے کی اجازت دے دی گئی ہے۔ ہفتہ کو اس وائرس سے متاثر ہونے والوں کی تعداد 503 تک جا پہنچی ہے۔
انہوں نے کہا کہ مختلف مراکز میں 1654 افراد کو الگ تھلگ رکھا گیا ہے۔ انہوں نے کہا کہ 25,937 افراد جن کو مختلف مراکز میں الگ تھلگ رکھا گیا تھا ان کو الگ تھلگ رکھنے کی مدت کی تکمیل کے بعد گھر جانے کی اجازت دے دی گئی ہے۔ انہوں نے کہا کہ 243 مقامات جن میں جی ایچ ایم سی حدود کے 123 مقامات اور دیگر علاقوں کے 120 مقامات شامل ہیں کی نشاندہی ناکہ بندی والے علاقوں کے طورپر کی گئی ہے۔
انہوں نے کہا کہ ریاست میں پہلی جماعت سے لے کر نویں جماعت کے طلبہ کو رعایتی طور پر کامیاب کرنے کا فیصلہ کیا گیا۔ انہوں نے کہا کہ یہ فیصلہ کابینہ کے اجلاس میں لیا گیا ہے۔ انہوں نے کہا کہ تمام سرکاری اور پرائیویٹ اسکولس کے طلبہ کو رعایتی طور پر کامیاب کرنے کا فیصلہ کیا گیا ہے۔ انہوں نے کہا کہ دسویں جماعت کے امتحانات جو درمیان میں روک دیئے گئے ہیں اس کے بارے میں جلد ہی فیصلہ کیا جائے گا۔
