تلنگانہ بی جے پی کے صدر بنڈی سنجے نے جی ایچ ایم سی انتخابات میں 48 نشستیں حاصل کرنے کے بعد کہا کہ عوامی اعتماد کے بغیر اتنی بڑی کامیابی ممکن نہیں تھی۔
انہوں نے کہا کہ انتخابی مہم کےلیے بہت کم وقت دیا گیا جس میں امیدواروں کا انتخاب بھی مشکل تھا لیکن بی جے پی نے ریاستی حکومت کی سازشوں کا مقابلہ کیا۔ انہوں نے الیکشن کمیشن پر بھی ٹی آر ایس کے اشاروں پر کام کرنے کا الزام عائد کیا۔
بنڈی سنجے نے کہا کہ قومی رہنماؤں کی جانب سے انتخابی مہم میں شرکت سے مقامی کارکنوں کے اعتماد میں اضافہ ہوا۔ اس الیکشن سے قبل بی جے پی کو صرف 10 فیصد ووٹ ہی حاصل ہوئے تھے لیکن حالیہ انتخابات میں بی جے پی کو 35.56 فیصد ووٹ حاصل ہوئے ہیں۔ ووٹوں کے فیصد سے معلوم ہوتا ہے کہ عوام ٹی آر ایس حکومت سے کتنی بدظن ہیں اور بی جے پی پر وہ کتنا اعتماد کرتے ہیں۔
انہوں نے حیدرآباد کا نام تبدیل کرکے بھاگیہ نگر رکھنے کے مطالبہ کا اعادہ کیا اور کہا کہ آئندہ بھی نام کی تبدیلی کی مانگ کو جاری رکھا جائے گا۔ انہوں نے کہا کہ ٹی آر ایس کو صرف 9000 ووٹ زیادہ ملے ہیں۔ انہوں نے مزید کہا کہ کل دہلی میں تلگو فلموں کی مشہور اداکارہ وجئے شانتی بی جے پی میں شامل ہوں گی۔
