جموں میں پریس کانفرنس سے خطاب کرتے ہوئے ریاستی الیکشن کمشنر کے کے شرما نے کہا کہ سب سے پہلے ڈی ڈی سی کے لیے انتخابات 28 نومبر سے مرحلہ وار ہوں گے جو 22 دسمبر کو اختتام پذیر ہونگے۔ ڈی ڈی سی انتخابات کے ساتھ، سرپنچ اور پنچایت کی خالی نشستوں کے لیے بھی بیک وقت انتخابات ہوں گے۔
انہوں نے کہا کہ پولنگ الیکٹرانک ووٹنگ مشینوں (ای وی ایم) کے ذریعہ ہوگی جب کہ کورونا وائرس کو مدنظر رکھتے ہوئے جسمانی طور پر کمزور یا بیمار رائے دہندگان کے لیے پوسٹل بیلٹ دستیاب ہوں گے۔
یہ بھی پڑھیں: آنگن واڑی ورکرز کا احتجاج
کے کے شرما نے کہا کہ سرپنچ اور پنچ انتخابات میں استعمال ہونے والی انتخابی فہرستوں کا استعمال ڈی ڈی سی انتخابات کے لیے کیا جائے گا اور ڈی ڈی سی انتخابات کے اعلان کے ساتھ ہی آج سے ضابطہ اخلاق کا نفاذ عمل میں رہے گا، جبکہ انتخابات کے پہلے مرحلے کے لیے پہلا نوٹیفکیشن 5 نومبر کو جاری کیا جائے گا۔
انہوں نے کہا کہ حلقہ بندی کے لیے حد بندی کی جا چکی ہے اور جموں و کشمیر UT میں 280 ڈی ڈی سی کی نشاندہی کی گئی ہے اور ڈی ڈی سی کی مدت پانچ سال کے لیے ہوگی۔
انہوں نے کہا کہ مغربی پاکستان پناہ گزین (ڈبلیو پی آر) بھی پہلی بار اپنے حق رائے دہی کے استعمال کے حقدار ہوں گے۔ مسٹر شرما نے کہا کہ انتخابات کے انعقاد کے دوران کورونا وائرس کے تمام رہنما خطوط پر عمل کیا جائے گا۔
