گرمائی دارالحکومت سری نگر میں جمعرات کو برستی بارش کے بیچ سیکورٹی فورسز ہائی الرٹ پر رہے اور گاڑیوں خاص طور پر دو پہیہ گاڑیوں کی تلاشی میں مصروف رہے۔
سرکاری ذرائع کا کہنا ہے کہ اگرچہ عسکریت پسندوں کی طرف سے حملوں کی کوئی ثقہ اطلاع نہیں ہے تاہم سیکورٹی فورسز کو ہائی الرٹ پر رکھا گیا ہے تاکہ مضافاتی علاقوں سے سری نگر میں اسلحہ داخل کرنے کی کسی بھی کوشش کو ناکام بنا دیا جائے۔
ذرائع نے بتایا کہ سری نگر کے تجاری مرکز لال چوک میں جمعرات کو سیکورٹی فورسز اہلکار ناکہ لگائے گاڑیوں کو روک کر تلاشی کرتے رہے اور مسافروں اور راہگیروں کی جامہ تلاشی کے علاوہ ان کے شناختی کارڈ بھی چیک کئے گئے۔
انہوں نے کہا کہ دو پہیہ والی گاڑیوں کو خاص طور پر روکا جاتا تھا اور ان پر سوار لوگوں کی خوب چھان بین اور تلاشی کی جاتی تھی۔
ذرائع نے بتایا کہ تلاشیوں کے دوران اب تک کسی کو گرفتار کرنے کی کوئی اطلاع نہیں ہے تاہم سری نگر کے باقی علاقوں میں بھی سیکورٹی فورسز الرٹ پر ہیں۔
