سرینگر :کیوریٹور سروے پرائیوٹ لمیٹیڈ‘ نامی کمپنی کی جانب سے دھوکہ دہی کے بعد جن افراد نے سوشل میڈیا سائٹوں پر کمپنی کے گھوٹالے کے بارے میں لوگوں کو آگاہ کیا ان میں سے کئی ایک کو اب ڈرایا اور دھمکایا جا رہا ہے۔
معلوم ہوا ہے کہ سائبر پولیس کشمیر میں خاتون سمیت متعدد افراد نے تحریری طور پر شکایت درج کی ہیں کہ انہیں فون پر ایک خاتون کی جانب سے جان سے مارنے کی دھمکیاں مل رہی ہیں۔ذرائع نے بتایا کہ سائبر پولیس نے معاملے کا سخت نوٹس لیتے ہوئے بڑے پیمانے پر تحقیقات شروع کی۔
اطلاعات کے مطابق 60 کروڑ آن لائن گھوٹالے کے بعد خواتین سمیت متعدد افراد کو ڈرایا و دھمکایا جارہا ہے۔ذرائع کے مطابق جن لوگوں نے جعلساز کمپنی کے حوالے سے ویڈیو اپ لوڈ یا شیئر کئے ان میں سے کئی ایک کو دھمکیاں دی جارہی ہیں۔
سرینگر سے تعلق رکھنے والی ایک خاتون نے نامہ نگاروں سے بات چیت کے دوران بتایا کہ اُس نے آن لائن گھوٹالے کا ایک ویڈیو شیئر کیا جس کے بعد انہیں فون پر دھمکیاں مل رہی ہیں۔انہوں نے بتایا کہ بدھ کی شام پانچ بجے ایک خاتون نے انہیں اور اہل خانہ کو مارنے کی دھمکی دی۔
انہوں نے مزید بتایا کہ فون پر دھمکی ملنے کے بعد فوری طور پر پولیس اسٹیشن خانیار میں شکایت درج کی اور بعد ازاں سائبر پولیس اسٹیشن کو بھی اس حوالے سے تحریری طور پر مطلع کیا۔مذکورہ خاتون نے بتایا کہ سائبر پولیس کے عہدیداروں نے اس موقع پر کہا کہ متعدد افراد نے اس حوالے سے تحریری طورپر شکایت درج کی ہے ۔
ان کے مطابق سائبر پولیس نے دھمکی دینے والوں کے خلاف باضابط طور پر کیس بھی درج کیا ہے۔
انہوں نے پولیس کے اعلیٰ حکام سے اپیل کی ہے کہ ایک طرف کشمیریوں کو ساٹھ کروڑ روپیہ کا چونا لگایا گیا اور دوسری جانب اس پر آواز اٹھانے والوں کو جان سے مارنے کی دھمکیاں مل رہی ہیں، لہذا ایسے افراد کو جلد ازجلد سلاخوں کے پیچھے دھکیل دیا جائے۔
