سرینگر: انجمن اوقاف جامع مسجد سرینگر نے میرواعظ کشمیر ڈاکٹر مولوی محمد عمر فاروق کو ریاستی انتظامیہ کی جانب سے مسلسل اپنی رہائش گاہ میں نظر بند کرکے، ان کی منصبی اور مذہبی فرائض کی ادائیگی پر قدغن عائد کئے جانے پر شدید حیرت اور افسوس کا اظہار کرتے ہوئے کہا ہے کہ میرواعظ کو آج حسب پروگرام ادارئہ اوقاف غوثیہ سرائے بالا کی دعوت پر حضرت پیران پیر شیخ سید عبدالقادر جیلانی ؒ کے عرس مبارک کے سلسلے میں منعقدہ سیرتی مجلس سے خطاب کرنا تھا، مگر ریاستی انتظامیہ نے کوئی معقول وجہ بتائے بغیر میرواعظ کی نظر بندی کو جاری رکھتے ہوئے وہاں جانے کی اجازت نہیں دی۔
بیان میں کہا گیا کہ میرواعظ جو 15 اکتوبر2023 سے مسلسل گھر میں نظر بند ہیں کے حوالے سے ریاستی انتظامیہ کا اس طرح کا رویہ صرف اور صرف مسلمانان کشمیر کیلئے مایوسی اور تکلیف کا باعث بنتا ہے۔ میرواعظ کے پروگرام کے حوالے سے آستانہ غوثیہ سرائے بالا میں ان کے وعظ و تبلیغ کو سننے کیلئے کثیر تعداد میں لوگ جمع ہوئے تھے، لیکن نظر بندی کی وجہ سے ان میں شدید مایوسی اور اضطراب پیدا ہوا۔
مزید پڑھیں: Urs Abdul Qadir Jilani شیخ عبدالقادر جیلانی ؒ کے عرس پاک کی مناست سے میرواعظ خطاب فرمائیں گے
بیان میں مزید کہا گیا کہ ایک طرف ریاستی انتظامیہ حالات کو سازگار ہونے کا دعویٰ کرتی ہے مگر دوسری طرف خالصتاً مذہبی پروگراموں پر بھی قدغن عائد کرنا سمجھ سے بالا تر ہے۔