ڈپٹی کمشنر سری نگر اعجاز اسد نے کہا ہے کہ اطمینان بخش ویکسینیشن تک کسی بھی کنٹینمنٹ زون کو ڈی نوٹیفائی نہیں کیا جائے گا۔ انہوں نے کہا کہ صحت عامہ کا تحفظ ترجیح ہے اور کووڈ 19 ایس او پیز پر کسی قسم کی کوتاہی برداشت نہیں کی جائے گی اور کووڈ 19 لاک ڈاؤن کی خلاف ورزی کرنے والوں کے خلاف قانون کے مطابق کارروائی کی جائے گی۔
ڈی سی نے یہ بات ضلع میں کووڈ 19 کے موجودہ حالات اور اس کی روک تھام، تخفیف اقدامات کے بارے میں بریفنگ دیتے ہوئے کہی۔
تفصیلات دیتے ہوئے ڈی سی نے بتایا کہ ضلع سری نگر میں مجموعی طور پر 68،228 کووڈ 19 مثبت کیس ریکارڈ ہوئے ہیں، ان میں سے اب تک 65،220 مریض صحتیاب ہوئے ہیں، جبکہ ضلع میں 2194 کووڈ 19 مثبت کیسز ابھی بھی سرگرم ہیں۔
انہوں نے بتایا کہ ضلع سری نگر میں صحتیابی کی شرح 95.5 فیصد ریکارڈ کی گئی ہے جبکہ مثبت معاملوں کی شرح 5.6 فیصد رہ گئی ہے۔
ڈی سی نے مزید کہا کہ میگا اینٹی کووڈ 19 ویکسی نیشن مہم آج ٹریڈ باڈیوں اور سول سوسائٹی کے ممبروں کے اشتراک سے اہم مقامات پر کیا جائے گا۔
ڈی سی نے بتایا کہ اب تک 304672 افراد کو ویکسینیشن کے جاری عمل کے تحت شامل کیا گیا ہے۔ انہوں نے مزید کہا کہ سرینگر جموں اور بارہمولہ اضلاع کے بعد تیسرا ضلع ہے جہاں کووڈ 19 کی سب سے زیادہ ٹیکے لگائے گئے ہیں۔
