حال ہی میں اختتام پذیر ہوئے ڈسٹرکٹ ڈیولپمنٹ انتخابات میں منتخب ہوئے ممبران حلف لیں گے۔
جموں و کشمیر کے لیفٹیننٹ گورنر منوج سنہا نے 26 دسمبر کو ایک تقریب کے دوران اس بات کی جانکاری دی تھی۔
انہوں نے کہا تھا کہ ڈی ڈی سی انتخابات کے پرامن انعقاد کے بعد اب جموں و کشمیر میں زمینی سطح پر جمہوریت کو مضبوط کیا گیا ہے۔ نئے منتخب ہوئے ممبران 28 دسمبر کو حلف لیں گے۔
واضح رہے کہ جموں و کشمیر میں 28 نومبر کو ڈی ڈی سی انتخابات کا پہلا مرحلہ شروع ہوا اور 19 دسمبر کو آٹھویں مرحلے کے ساتھ ہی انتخابات اختتام کو پہنچے۔ 22 دسمبر کو نتائج کا اعلان کیا گیا۔
حتمی نتائج کے اعلان کے بعد پی اے جی ڈی (گپکار الائنس) نے 110 نشستوں پر کامیابی حاصل کی تھی جبکہ بی جے پی 75 نشستیں حاصل کرنے والی واحد سب سے بڑی جماعت بن کر ابھری۔ کانگریس اور جموں و کشمیر اپنی پارٹی نے بالترتیب 26 اور 12 نشستوں پر کامیابی حاصل کی۔ مجموعی طور پر 50 نشستوں کا ایک بڑا حصہ آزاد امیدواروں کے حق میں گیا۔
گزشتہ برس 5 اگست کو جموں و کشمیر کی خصوصی پوزیشن منسوخ کرنے کے بعد یہ سب سے بڑا سیاسی عمل تصور کیا جاتا ہے۔ انتخابات کا اعلان چار نومبر کو کیا گیا تھا جس کے بعد خطہ میں سیاسی جمود ٹوٹ گیا۔
