فرانسیسی صدر کا اسلاموفوبیا سے متعلق بیانات ناقابل قبول

فرانسیسی صدر کے اسلامی فوبیا کے حوالے سے دئیے گئے بیان کی نہ صرف عالم اسلام بلکہ پوری مہذب دنیا میں شدید الفاظ میں مذمت کی جا رہی ہے۔

ادھر وادی کشمیر میں بھی تمام دینی، ملی، سماجی، تعلیمی انجمنوں، سرکردہ علماء اور مشائخ بھی فرانسیسی صدر ایمانوئیل میکرون کے دین انسانیت اور دین رحمت یعنی اسلام کے خلاف دئے گئے بیان پر سخت برہمی اور ردعمل کا اظہار کرتے ہوئے اس کی پرُزور مذمت کرتے ہیں۔

ای ٹی بھارت کے ساتھ مولانا عبدالرحمان شمس نے اس واقعے کی سخت الفاظ میں مذمت کرتے ہوئے کہا کہ ماہ ریبع اول جو کہ پیغبر انسانیت آنحضور ﷺ کی ولادت باسعادت کا متبرک مہینہ ہے، میں اس طرح کی حرکت اور بیان دانستہ طور ایک مذموم سازش ہے ۔

انہوں نے کہا کہ ہم فرانسیسی صدر جیسے رہنماؤں اور اسلام مخالف ذہنیت رکھنے والوں کو آگاہ کرتے ہیں کہ آج کے دور میں بھی مسلمان ہر چیز برداشت کرسکتے ہیں ۔لیکن دین اسلام ،پیغمبر اسلام ﷺ اور قرآن کریم کی توہین اور تضحیک کسی بھی قیمت پر بر داشت نہیں کرسکتے ۔

مولانا عبدالرحمان شمس نے کہا کہ فرانسیسی صدر کے بیانات سے مسلمانوں کے جذبات مجروح ہوئے ہیں۔ اور ان بیانات کے خلاف امن پسند اقوام و ممالک کو سنجیدہ نوٹس لینا چاہیے اور اس طرح کے بے لگام عناصر کو لگام لگانے کی کوششیں کی جانی چاہیے۔