سرینگر: جموں و کشمیر اور لداخ ہائی کورٹ نے مشاہدہ کیا ہے کہ ’’خصوصی طور پر معذور افراد کے ساتھ عالمی سطح پر تسلیم شدہ زبان کے ذریعہ مناسب سلوک کیا جائے۔‘‘ چیف جسٹس علی محمد ماگرے اور جسٹس راہول بھارتی کی ڈویژن بنچ نے بھی ’’امید اور اعتماد‘‘ کا اظہار کیا کہ پورا معاشرہ ان کے حقوق کو تسلیم کرے گا جیسا کہ آئین کے تحت ضمانت دی گئی ہے۔ عدالت نے یہ بات ایڈوکیٹ بدر الدجی کے ذریعے دائر کی گئی مفاد عامہ کی عرضی (پی ائی ایل) پر مرکز اور جموں و کشمیر حکومت کو نوٹس جاری کرتے ہوئے کہی۔ High Court on Specially Abled Persons
حکومت کے ساتھ ساتھ عام لوگوں کو جسمانی طور معذور افراد کو 'ذہنی طور پر معذور، بیمار، بدقسمت، معذور، غیر معمولی، مینٹل، غریب، بدقسمت، اپاہج، وغیرہ‘‘ ناموں سے پکارنے سے پرہیز کیے جانے سے متعلق پی آئی ایل دائر کی گئی ہے۔ پی آئی ایل میں ملٹی ڈسیبلٹی ایکٹ، 1999 سمیت دیگر قوانین میں ’’مینٹلی ریٹارڈڈ' لفظ کی مناسب ترمیم کی بھی سفارش کی گئی ہے۔
بنچ نے پی آئی ایل کی سماعت کے دوران کہا: ’’ ہمارا خیال ہے کہ اٹھائے گئے مسئلے کو جواب دہندگان کی جانب سے حل کرنے کی ضرورت ہے، تاکہ عالمی کنونشنز کے معیار کے مطابق خصوصی طور پر خاص افراد کو ذاتی و سماجی طور پر تعاون دیکر ان کے جذبات کی قدر کی جائے۔‘‘ عدالت نے مزید کہا کہ درخواست گزار نے جموں و کشمیر اور لداخ میں مختلف دفاتر/ عدالتوں سے رجوع کرتے وقت خصوصی طور پر معذور افراد کو درپیش مشکلات کو بھی اجاگر کیا ہے۔
