کورونا وائرس کی دوسری لہر پہلے سے کئی گنا زیادہ مہلک اور خطرناک ثابت ہو رہی ہے۔ گذشتہ کئی دنوں سے نئے مریضوں کی تعداد چار لاکھ سے بھی تجاوز کر چکی ہے اور تین ہزار سے زائد ہلاکتیں ہورہی ہیں۔ وبا پر قابو پانے کے لیے متعددریاستوں میں جزوی لاک ڈاؤن اور نائٹ کرفیوں نافذ کیا گیا ہے، اسی طرح جموں و کشمیر میں بھی نائٹ کرفیو نافذ ہے۔
اس سلسلے میں ڈپٹی کمشنر کپواڑہ امام الدین نے آج متعلقہ افسران کے ہمراہ ضلع بھر میں قائم مختلف ناکہ پوائنٹس کا دورہ کیا اور گراونڈ میں نافذ کورونا کرفیو کا جائزہ لیا۔ اس دورے کے دوران ڈپٹی کمشنر نے مختلف مقامات پر مختلف ناکہ پوائنٹس کا معائنہ کیا جن میں سالکوٹ، برنواری، کپواڑہ بمہامہ اور کاواری شامل ہیں۔
ڈپٹی کمشنر نے ڈیوٹی مجسٹریٹوں کو ہدایت کی کہ کوڈ چین کو توڑنے کے لیے رہنما ہدایات پر سختی سے پابندی عائد کی جائے۔
ڈپٹی کمشنر نے لوگوں سے اپیل کی کہ وہ کوووڈ کے رہنما ہدایات پر عمل کریں، ماسک کے استعمال کو یقینی بنائیں، ہاتھوں کی صفائی کریں اور معاشرتی فاصلے کو برقرار رکھیں۔ اس کے علاوہ غیر ضروری طور پر اپنے گھروں سے باہر جانے کی کوشش نہ کریں۔ ڈپٹی کمشنر نے عوام کو مہلک بیماری سے پاک کرنے کے لیے انتظامیہ کے ساتھ تعاون کرنے کی بھی اپیل کی۔
