ضلع رام بن کے جواری سمبڑ علاقے میں آج تک بجلی نہیں پہنچی ہے۔ اکیسویں صدی میں بھی علاقہ بجلی جیسی بنیادی ضرورت سے محروم ہے۔
علاقے میں بجلی ترسیلی لائنیں اور کھمبے نصب کیے گئے ہیں، تاہم ابھی تک علاقے میں بجلی نظام کو فعال نہیں بنایا گیا جس کے سبب لوگوں خصوصا طلبہ کو کافی دقتوں کا سامنا کرنا پڑ رہا ہے۔
مقامی باشندں نے ای ٹی وی بھارت کے ساتھ بات کرتے ہوئے کہا کہ علاقے میں کھمبے اور تاریں نصب کرنے کے باوجود متعلقہ محکمہ علاقے میں بجلی کی سپلائی کو یقینی بنانے میں ناکام ہے۔
انہوں نے الزام عائد کرتے ہوئے کہا کہ حکومت کی جانب سے مرتب کردہ ضابطوں کو بالائے طاق رکھتے ہوئے ٹھیکہ داروں نے ترسیلی لائنیں اور کھمبے اپنی مرضی کے مطابق نصب کیے۔
ای ٹی وی بھارت کے ساتھ بات کرتے ہوئے مقامی باشندوں نے بتایا کہ گائیڈ لائنز کے برعکس علاقے میں بجلی ترسیلی لائنیں پُرخطر مقامات پر نصب کی گئی ہیں جو کبھی بھی وبال جن بن سکتی ہیں۔
مزید پڑھیں؛ رامبن: تعمیراتی کمپنی اور انتظامیہ کے خلاف احتجاج
انہوں نے دعویٰ کیا کہ ٹھیکہ داروں نے محکمہ بجلی کے افسران کی ساز باز کے ساتھ مختلف مقامات پر بجلی لائنیں سرسبز درختوں کے ساتھ باندھ دی ہیں۔
اکیسویں صدی میں بھی بجلی کی محرومی پر مقامی باشندوں خصوصا طلبہ نے انتظامیہ کو شدید تنقید کا نشانہ بنایا۔ طلبہ کا کہنا ہے کہ بجلی کی عدم دسیتابی کے باعث ان کی پڑھائی کافی متاثر ہو رہی ہے۔
