راجستھان حج ویلفیئر سوسائٹی کی جانب سے وقت وقت پر حج کو لے کر کوئی نہ کوئی مطالبہ کیا جاتا رہا ہے، ایسے میں اب مرکزی حج کمیٹی کی جانب سے نیا سرکلر جاری ہونے کے بعد ایک بار پھر اس تنظیم نے ایک بڑا مطالبہ کیا گیا ہے۔
عالمی وباء کورونا کی وجہ سے آج مقدس سفر حج 2020 کو منسوخ کیے جانے کے امکان ہیں، حالانکہ اس بارے میں ابھی تک سعودی حکومت کی جانب سے کوئی فیصلہ نہیں لیا گیا ہے لیکن مرکزی حج کمیٹی کی جانب سے گزشتہ دو روز قبل ایک سرکلر جاری کیا گیا تھا۔
اس سرکلر میں یہ کہا گیا تھا کہ جو عازمین حج اپنی رقم واپس لینا چاہتے ہیں وہ تمام لوگ ایک درخواست دے کر اپنا پیسہ واپس لے سکتے ہیں، اس سرکلر جاری ہونے کے بعد یہ قیاس لگایا جارہا ہے کی اس بار حج منسوخ ہو سکتا ہے۔
وہیں یہ سرکلر جاری ہونے کے بعد سے راجستھان حج ویلفیئر سوسائٹی کی جانب سے بھارت کے صدر, وزیر اعظم نریندر مودی اور مرکزی اقلیتی وزیر مختار عباس نقوی کو ایک خط لکھا گیا ہے۔
اس خط میں یہ مطالبہ کیا گیا ہے کہ حج 2020 ہونے کے کوئی آثار نظر نہیں آ رہے ایسے میں جن لوگوں کا قرعہ اندازی کے ذریعہ نمبر آیا ہے۔ سنہ 2021 میں ان تمام لوگوں کو حج کے مقدس سفر پر بھیجا جائے اور ان تمام لوگوں کو ہی ترجیح دی جائے۔
راجستھان حج ویلفیئر سوسائٹی کے جنرل سیکرٹری حاجی نظام الدین نے بتایا کہ ہماری تنظیم کی جانب سے ایک خط لکھا گیا ہے ۔انہوں نے بتایا کہ ہمارے پاس عازمینِ حج کے فون آرہے ہیں وہ ہم سے یہ پوچھ رہے ہیں کہ چھ برس میں ہمارا نمبر آیا ہے اگر اب بھی ہم حج پر نہیں جا پائیں گے تو یہ ہماری بدقسمتی ہوگی اس لئے ان کی ضرورت کو دیکھتے ہوئے انہیں آئندہ برس 2021 میں حج کے سفر پر بھیجا جائے۔
