راجستھان کے دارالحکومت جے پور کے جھالاپاٹن علاقے میں آج بی جے پی نوجوان مورچہ کی جانب سے حکومت کے خلاف شدید احتجاج کیا گیا۔ جس میں حکومت کے خلاف نعرے بازی بھی کی گئی۔
اس دوران پولیس کی جانب سے بی جے پی نوجوان مورچہ کے کارکنان پر لاٹھی چارج کردیا گیا، جس سے جائے وقوع پر افراتفری کا ماحول پیدا ہوگیا اور کئی کارکنان شدید طور پر زخمی ہوگئے، جنہیں جے پور کے سوائی مان سنگھ ہسپتال میں داخل کرایا گیا۔
پولیس کے لاٹھی چارج میں بی جے پی کارکنان کے زخمی ہونے کی اطلاع پر بی جے پی کے ریاستی صدر ستیش پونیا سوائی مان سنگھ ہسپتال پہنچے اور زخمی کارکنان کے حالات سے واقفیت حاصل کی۔
مزید پڑھیں: جھالاواڑ: ڈمپر سے کچل کر ایک ہی کنبہ کے پانچ افراد کی موت
ستیش پونیا نے میڈیا سے بات کرتے ہوئے کہا کہ 'آج راجستھان میں جس طرح سے ہر روز نئے نئے واقعات سامنے آرہے ہیں یہ افسوسناک ہے' انہوں نے کہا کہ گزشتہ روز جھالاپاٹن علاقے میں ایک خاتون کو پیٹ پیٹ کر ہلاک کردیا گیا اور اس معاملے میں احتجاج کررہے بی جے پی کے کارکنان پر آج لاٹھی چارج کیا گیا اس سے ریاست میں لا اینڈ آرڈر کا صاف پتہ چلتا ہے۔
