راجستھان کے وزیراعلی اشوک گہلوت نے بھارت کے مشہور شاعر راحت اندوری کے انتقال پر غم کا اظہار کیا۔ گہلوت نے کہا کہ اردو ادب میں راحت اندوری کا اپنا ایک الگ مقام تھا، ان کا انداز بیاں الگ تھا، اور ان کی شاعری میں بے باکی ہوا کرتی تھی۔
وزیر اعلی اشوک گہلوت نے کہا کہ ملک کے موجودہ حالات کو بھی راحت اندوری اپنی شاعری میں بڑے خوبصورت انداز میں پیش کرتے تھے، راحت اندوری کا یوں چلا جانا اردو شاعری کے لئے بہت بڑا نقصان ہے، راحت اندوری کا جو مقام تھا وہ سبھی سے مختلف تھا، ان کی بھرپائی ناممکن ہے۔
وزیراعلیٰ اشوک گہلوت نے مرحوم شاعر کی مغفرت اور انہیں جنت الفردوس میں اعلی مقام عطا کرنے کی دعا کی، اور راحت اندوری کے خاندان اور ان کے چاہنے والوں کو صبر عطا کرنے اور ہمت رکھنے کی دعا کی۔
راجستھان حکومت میں فن اور ثقافت کے وزیر بی ڈی کلہ نے بھی راحت اندوری کے انتقال کی خبر ملنے کے بعد اپنے غم کا اظہار کرتے ہوئے کہا کہ 'راحت اندوری صاحب اپنے آپ میں ایک شاعر ہونے کے ساتھ ساتھ بھارت کی بہترین شخصیات میں سے ایک تھے'۔
