اجمیر: خواتین کے لباس میں زر دوزی کا کام اپنی الگ پہچان رکھتا ہے۔ ابھی تک جے پور اور جودھپور زر دوزی کے کام کے لیے مشہور تھے لیکن اب اجمیر کے کاریگروں نے بھی اس میں مہارت حاصل کر لی ہے اور یہی وجہ ہے کہ ملک کی مختلف ریاستوں سے زر دوزی کے لیے ساڑیاں اجمیر آتی ہیں جن پر یہاں خوبصورتی سے کام کیا جاتا ہے۔ تاہم اس کام میں ماہر کاریگروں کا کہنا ہے کہ مشینوں کے آجانے سے دست کاروں کی کمائی کم ہوگئی ہے اور وہ جتنی محنت کرتے ہیں انہیں اتنا پیسہ نہیں ملتا۔
زر دوزی کے کاریگر نواب خان کا کہنا ہے کہ پہلے کپڑوں پر ہاتھ سے ڈیزائن بنا کر دکاندار کو دکھائے جاتے تھے، لیکن اب وقت بدل چکا ہے دکاندار پہلے ہی کمپیوٹرائزڈ سیٹ بنا لیتے ہیں اور پھر اس ڈیزائن کے مطابق کپڑے سجائے جاتے ہیں۔ اس کام میں سلمیٰ اسٹار اور جیری کے ساتھ ساتھ مہنگے زرکن بھی استعمال کیے جاتے ہیں۔ اس کام کے لیے ایک خاص قسم کی سوئی استعمال کی جاتی ہے اور اس کے مطابق ایک کپڑے کو سجانے میں 1 ہفتہ کا وقت لگ جاتا ہے۔ Ajmer Artisans Gaining Expertise in Embroidery
