پنجاب: سنیل جاکھڑ کا سونیا گاندھی سے مطالبہ

پنجاب کانگریس کے صدر سنیل جاکھڑ نے پارٹی کے اعلیٰ کمان سے پارٹی کے دو راجیہ سبھا رکن پرتاپ باجوا اور شمشیمر سنگھ باجوا دولو کے خلاف کاروائی کرنے کا مطالبہ کیا ہے۔کیونکہ انہوں نے زہریلی شراب کے معاملے میں اپنی ہی حکومت کو ہدف تنقید بنایا ہے۔

سنیل جاکھڑ نے یہاں جاری ایک بیان میں کہا کہ' وہ کانگریس کی صدر سونیا گاندھی کو خط لکھ کر ان دونوں اراکین پارلیمان کے خلاف سخت کاروائی کا مطالبہ کریں گے۔

انہوں نے زہریلی شراب پی کر ہلاک ہونے والوں کے اہل خانہ کے تئیں ہمدردی کا اظہار کرتے ہوئے کہا کہ' اس طرح کا واقعہ کسی کو ڈسپلن کی خلاف ورزی کرنے میں ملوث ہونے کا لائیسنس نہیں دیتا۔

سنیل جاکھڑ نے کہا کہ' یہ اراکین پارلیمان جس تھالی میں کھاتے ہیں اسی میں چھید کرتے ہیں۔ یہ وقت اپنی ہی حکومت پر حملہ کرنے کا نہین ہے۔ جب حکومت پر چو طرفہ حملے ہو رہے ہوں تو اسے خود غرض رہنماؤں سے بچانے کی ضرورت ہوتی ہے۔ یہ دونوں اپنی خواہشوں اور خود غرضیوں کے لیے شراب کے معاملے کو سیاسی رنگ دے رہے ہیں۔ انہوں نے کہا کہ دولو اور باجوا کو اب زیادہ برداشت نہیں کیا جا سکتا۔