گجر بستی کملا میں بنیادی سہولیات کی عدم دستیابی سے تنگ آکر آج درجنوں افراد نے اے ڈی سی آفس ترال کے سامنے خاموش احتجاج کیا اور اپنے مطالبات کو انتظامیہ کی نوٹس میں لانے کی کوشش کی۔
اطلاعات کے مطابق گجر بستی سیموہ کے رہنے والے لوگوں کی ایک بڑی تعداد نے ترال آکر احتجاج کیا اور اپنی ناراضگی کا اظہار کیا۔
مقامی لوگوں کے مطابق ان کی آبادی میں کوئی بھی بنیادی سہولت موجود نہیں ہے جس کی وجہ سے آبادی کو مشکلات کا سامنا ہے۔ مقامی لوگوں کے مطابق گاؤں میں نہ سڑک ہے اور نہ ہی بجلی جبکہ پینے کے پانی کی عدم دستیابی سے مقامی آبادی ترک سکونت پر مجبور ہو رہی ہے۔
ایک مقامی احتجاجی شبیر احمد نے میڈیا سے کو بتایا کہ سرکاری دعوؤں کے باوجود ان کی بستی بنیادی سہولیات سے محروم ہے اور شدت کی سردی کے ان ایام میں خواتین کو تین کلو میٹر سے پانی لانا پڑتا ہے جبکہ علاقے میں رابطہ سڑک کی خستہ حالی سے گاؤں باقی دنیا سے کٹ کے رہ گیا ہے۔
انہوں نے انتظامیہ سے اپیل کی ہے کہ ان کے گاؤں میں بنیادی سہولیات کو فراہم کیا جائے۔
واضح رہے کہ گزشتہ دنوں ای ٹی وی بھارت نے گجر بستی کملا نامی اس بستی پر ایک خصوصی رپورٹ پیش کی تھی۔
