اونتی پورہ پولیس کے ایک پریس ریلیز کے مطابق ترال کے ڈاڈسرہ نامی گاؤں میں مقامی بینک شاخ پر مامور سکیورٹی گارڈ سے بارہ بور رائفل چھیننے میں ملوث دوسرا ملزم بھی گرفتار کر لیا گیا ہے جبکہ پہلا تیس گھنٹے میں ہی بارہ بور رائفل سمیت گرفتار کر لیا گیا تھا۔
تفصیلات کے مطابق اسی ماہ کے انیس تاریخ کو ڈاڈسرہ میں قائم جموں و کشمیر بینک کی شاخ پر تعینات ایک پرائیویٹ کمپنی کے ساتھ کام کرنے والے سیکورٹی گارڈ پر ماسک پہنے دو نوجوانوں نے کلہاڑی سے حملہ کر کے اسکی بارہ بور رائفل چھین لی تھی۔
بعدازاں پولیس نے سی سی ٹی وی فوٹیج کے ذریعے دونوں ملوث افراد کو پکڑنے کی تلاش شروع کی اور محض تیس گھنٹوں کے دوران ہی چھینی گئی بارہ بور رایفل اور ایک ملوث نوجوان کو گرفتار کیا تھا۔
آج دوسرے نوجوان کو بھی گرفتار کر لیا گیا ہے اور اس کے خلاف ایف آئی آر زیر نمبر 18/2020 درج کر کے تحقیقات شروع کردی ہے۔
