ضلع پلوامہ کے کنڈی پنجگام علاقے میں مختلف میوہ جات اور سبزیوں کے علاوہ کسان دھان کی بھی کاشت کرتے ہیں۔ تاہم امسال سینچائی کے لیے معقول پانی کا بندوبست نہ ہونے سے کسان بے حد پریشان ہیں۔
کسانوں نے ای ٹی وی بھارت کے ساتھ بات کرتے ہوئے کہا کہ حالیہ تعمیر شدہ ملنگام - پنجگام شاہراہ کے سبب انکے کھیتوں کی اور آنے والا پانی منقطع ہو گیا۔
انہوں نے کہا کہ سڑک میں مختلف مقامات پر چھوٹی چھوٹی نالیاں موجود تھیں جسے تعمیر کے دوران مکمل طور بند کر دیا گیا جس سے دھان کی فصلوں کی اور آ رہے پانی کا سلسلہ منقطع ہو گیا۔
کسانوں نے محکمہ اریگیشن پر الزام عائد کرتے ہوئے کہا کہ ’’ہمارے کھیتوں کی اور آ رہے پانی کا اکلوتہ ذریعہ بند ہونے سے کھیتوں کی نمی چلی گئی ہیں۔ دھان کی فصل سینچائی کے بغیر تباہی کے دہانے پر ہے۔‘‘
کسانوں نے الزام عائد کرتے ہوئے کہا کہ ’’محکمہ ایریگیشن کی جانب سے غیر سنجیدگی کا مظاہرہ کیے جانے کے سبب علاقے کی کسان فاقہ کشی کے شکار ہو سکتے ہیں۔‘‘
انہوں نے مزید کہا کہ ’’سڑک کی تعمیر بھی ضروری ہے تاہم حکام کو چاہئے کہ کسانوں کے لیے سینچائی کے ذرائع کو بند نہ کیا جائے۔‘‘
