کرونا وائرس کے بڑھتے ہوئے واقعات کے پیش نظر تحصیلدار پانپور نے آج قصبہ پانپور کی تمام مساجد کے ائمہ اور دکانداروں کی ایک میٹنگ طلب کی۔ اس میں کورونا وائرس جیسی مہلک بیماری کے کیسز کے اضافے کے پیش نظر لوگوں کو ایس او پیز پر عمل پیرا ہونے کی ہدایت دی۔
تحصیلدار پانپور اشتیاق محی الدین نے مساجد کے ائمہ کو ہدایت دی کہ وہ باجماعت نماز کے دوران سماجی دوری کے علاوہ ماسکس لگانے کا اہتمام کریں تاکہ کورونا وائرس کے انفیکشن کو پھیلنے سے روکا جا سکے۔
انہوں نے مساجد کے ائمہ پر زور دیا کہ وہ ایس او پیز پر سختی سے عمل کریں، ورنہ پریشانی ہو سکتی ہے۔
یہ بھی پڑھیں: پلوامہ: جل جیون مشن کے نفاذ کا جائزہ
تحصیلدار نے دکانداروں کو سرکار کی طرف سے جاری کیے گئے گائیڈلائنز پر سختی سے عمل پیرا ہونے کو کہا۔ انہوں نے دکانداروں سے کہا کہ وہ طاق، جُفت طریقے سے اپنی دکانوں کو کھلا رکھیں اور بنا ماسکس کے کسی کو بھی اشیاء ضروریہ فروخت نہ کریں۔ انہوں نے دکانداروں کو تنبیہہ کی ہے کہ وہ گائیڈ لائنز کو اپنائیں، ورنہ ان کے خلاف سخت کارروائی کی جائے گی۔
