پلوامہ (جموں کشمیر) : ’’گجر بکروال طبقہ کو آج تک متواتر سرکاروں نے اپنے ووٹ بینک کے لیے استعمال کیا ہے، تاہم اس طبقہ کی ترقی کے لیے اقدامات کے بجائے زبانی جمع خرچ سے کام لیا جا رہا ہے۔‘‘ ان خیالات کا اظہار گجر بکروال کانفرنس کے سینئر لیڈر زاہد پرواز چودھری نے ای ٹی وی بھارت کے ساتھ ایک خصوصی انٹرویو میں کیا۔ چودھری نے کہا کہ ’’فارسٹ رائٹ ایکٹ کو نافذ کرنے کا اعلان تو بڑے طمطراق سے کیا گیا لیکن صورتحال اس کے برعکس ہے کیونکہ کسی بھی جگہ فارسٹ رائٹ کلیم کو منظور نہیں کیا جا رہا ہے۔‘‘
زاہد پرواز کے مطابق گجر بکروال طبقہ کو تیسری بڑی آبادی قرار دیا جا رہا ہے لیکن یہ طبقہ اب بھی پسماندگی کا شکار ہے اور گزشتہ دو برسوں سے سڑکوں پر احتجاج کر رہے ہیں۔ انہوں نے کہا کہ ان حالات میں اس طبقہ کی فلاح وبہبود کے نعرے محض سیاسی نعرے بازی ہے۔ زاہد پرواز چودھری کے مطابق ’’جہاں تک سیاسی ریزرویشن کی بات ہے ہمیں ان ہی نشستوں پر دی جا رہی ہے جہاں ہم قدیم زمانے سے جیت درج کرتے آئے ہیں۔‘‘
مزید پڑھیں: Gujjar Bakarwal protest کولگام میں گجر اور بکروال طبقے کا احتجاج
پہاڑیوں کو ریزرویشن دینے کے معاملہ پر زاہد پرواز نے بتایا کہ ’’اس طبقہ کو پہلے ہی ریزرویشن دی گئی ہے اور اب دوبارہ ریزرویشن دے کر سرکار کے کیا مقاصد ہیں؟ وہ ہمیں اچھی طرح معلوم ہیں اور اسی لیے ہم روز اول سے اس بل کی مخالفت کر رہے ہیں جبکہ حال ہی میں ہم نے سرینگر میں مہا پنچایت کا اہتمام کیا اور اب جموں میں بھی ایک مہا پنچایت منعقد ہو گی تاکہ ارباب اقتدار کو آگاہ کیا جائے۔‘‘ چودھری نے انتباہ کرتے ہوئے کہا: ’’اگر سرکار نے ہماری مانگ کو نہیں مانا تو پھر اگلے لوک سبھا انتخابات میں ہمارا طبقہ ووٹ کے ذریعے جواب دے گا۔‘‘
