مالیگاؤں شہر ترقیاتی کاموں سے محروم کیوں؟

ریاست مہاراشٹر کے مسلم اکثریتی شہر مالیگاؤں کی تعمیر و ترقی سب سے بڑا مسئلہ ہے۔ شہر میں بنیادی مسائل سے لیکر ترقیاتی منصوبوں پر آج تک کوئی عمل نہیں ہو پایا ہے۔

مالیگاؤں شہر کے رکن اسمبلی مفتی محمد اسماعیل قاسمی نے صحافیوں سے شہر کے نامکمل ترقیاتی کاموں اور منصوبوں پر بات چیت کی اور لاک ڈاؤن کے دوران مجلس اتجاد المسلمین پارٹی کی سماجی و سیاسی خدمات پر روشنی ڈالی۔

مفتی محمد اسماعیل قاسمی نے کہا کہ شہر کے بڑے ترقیاتی کاموں میں سٹی ڈیولپمنٹ پلان، دو فلائی اوور بریج، سرکاری کالج اور یونیورسٹی، سرکاری ملٹی اسپیشلسٹ ہسپتال، ریلوے لائن اور شہر کو ضلع کا درجہ سے آج تک محرومی کا شکار ہے۔جس کی بہت ساری وجوہات ہیں۔

شہر کے مقامی سیاسی رہنماؤں نے شہر کی ترقی اور عوامی مفاد عامہ کے لیے کبھی بھی ایک ساتھ کر کام نہیں کیا۔ یہاں تک کے لاک ڈاؤن اور کورونا وبا کو لیکر مقامی سطح پر مجموعی طور پر سیاسی جماعتیں ایک جٹ نہیں ہوئی۔

واضح رہے کہ مالیگاؤں سینٹرل میں مجلس اتجاد المسلمین سے رکن اسمبلی مفتی محمد اسماعیل قاسمی ہیں اور کارپوریشن میں برسر اقتدار گروپ کانگریس پارٹی کی میئر طاہرہ شیخ رشید ہے۔ اسی طرح سے مالیگاؤں آوٹرمیں شیوسینا سے رکن اسمبلی و ریاستی وزیر دادا بھسے ہیں اور دھولیہ مالیگاؤں حلقہ سے بی جے پی کے رکن پارلیمان ڈاکٹر سبھاش بھامرے ہیں۔