اورنگ آباد شہر میں کورونا مریضوں کی تعداد 600 سے تجاوز کرگئی ہے، ڈبلیو ایچ او کی ایما پرکلکٹر آفس میں ایک اعلیٰ سطح کا جائزہ اجلاس ہوا۔
اس اجلاس میں کورونا وبا کی روک تھام کے لیے سرکاری سطح پرجاری اقدامات کی جانکاری اور ضروری ہدایات فراہم کی گئیں۔
اس موقع پر ضلع کلکٹرسمیت اعلیٰ سرکاری حکام کو شہر کے اکابرین کے تیکھے سوالات کا سامنا کرنا پڑا۔ واضح رہے یہ اجلاس اپنے مقررہ وقت سے چار گھنٹے تاخیر سےشروع ہوا تھا۔
سرکاری عملے میں تال میل کی کمی سوشل ڈیسٹینس کے نام پر سماجی بائیکاٹ اور ایک مخصوص طبقے کے خلاف میڈیا ٹرائل سے عوامی حلقوں میں پھیل رہی غلط فہمیوں کی جانب بھی اعلی حکام کی توجہ دلائی گئی، ساتھ ہی مریضوں کے ساتھ طبی عملے کے برتاؤ کو ناقابل قبول قرار دیا گیا۔
علما کاکہنا ہے کہ منصوبہ بندی کا فقدان صاف نظر آرہا ہے، جس کے نتیجے میں خوف و ہراس پھیل رہا ہے۔ شرکا اس بات کو لیکر بھی برہم تھے کہ محض ایک کمیونٹی کے نمائندوں کو ہی کیوں مدعو کیا گیا۔
مہاراشٹر کے وزیر صحت راجیش ٹوپے کی اورنگ آباد آمد کے تناظر میں یہ اجلاس ہوا، لیکن ریاستی وزیر اپنی مصروفیات کی وجہ سے اجلاس میں شرکت کرنے سے قاصر رہے۔
