سنجے راوت نے کہا کہ 'خیر سگالی کے جذبے کے تحت ان سے ملاقات کی گئی۔ شرد پوار ملک و ریاست کے ایک سینیئر رہنما ہیں۔ وہ آج مہاراشٹر کی سیاسی صورتحال سے پریشان ہیں۔ ہم نے مختصر گفتگو کی'۔
مہاراشٹر میں حکومت سازی کے لیے آخری تاریخ تیزی سے قریب آرہی ہے، شیوسینا اقتدار کے مساوی حصے سے زیادہ کچھ بھی طے کرنے کے لیے تیار نہیں ہے کیونکہ سنجے راوت نے بدھ کے روز بی جے پی کے ساتھ کسی بھی نئے سمجھوتے تک پہنچنے کے امکان کو قطعی طور پر مسترد کر دیا۔
بی جے پی اور شیوسینا کے درمیان تلخ کلامی کا سلسلہ جاری ہے لیکن آخر کار کابینہ کے محکموں اور وزیراعلی کی میعاد کے ڈھائی سال کے عرصے میں یکساں حصے کے مطالبے پر شیوسینا بضد ہے۔
بی جے پی 105 نشستوں پر کامیابی حاصل کرکے سب سے بڑی جماعت بن کر سامنے آئی ہے جبکہ 288 رکنی ریاستی اسمبلی میں شیوسینا نے 56 سیٹیں حاصل کی ہیں۔ 24 اکتوبر کو اسمبلی انتخابات کے نتائج کا اعلان کیا گیا تھا۔
