مہاراشٹر وہ ریاست ہے جہاں سے ملک اور بیرون ملک پیاز سپلائی کی جاتی ہے، لیکن اس مرتبہ لاک ڈاؤن اور بے موسم بارش نے پیاز کی فصل کو پوری طرح سے برباد کر دیا ہے۔
ضلع اورنگ آباد کے مختلف دیہاتوں میں آپ کو جگہ جگہ کوڑے میں تبدیل پیاز کے ڈھیر نظر آجائیں گے، ای ٹی وی بھارت کے نمائندے اسرار چشتی نے گنگاپور میں پیاز کے کھیتوں کا جائزہ لیا۔
پیاز کی پیداوار کے معاملے میں ریاست مہاراشٹر پورے ملک میں مشہور ہے ریاست کے مختلف اضلاع سے پیاز ناسک کے لاسل گاؤں منڈی میں پہنچتی ہے اور وہاں سے ملک اور بیرون ملک میں بھیجی جاتی ہے۔
لیکن اس مرتبہ پہلے تین مہینے لاک ڈاون نے پیاز کی فصل کو بازار تک پہنچنے نہیں دیا تاہم کسان پر امید تھے کہ لاک ڈاون کے بعد انہیں کچھ راحت ملیں گی لیکن مارچ کے مہینے میں ہوئی بے موسم بارش نے پیاز کو پانی پانی کردیا۔
کسانوں نے پچھلے پانچ مہینوں میں پیاز کی جو ذخیرہ اندوزی کی تھی وہ پانی کی نذر ہوگئی ہزاروں روپے خرچ کرکے لاکھوں کی آس لگائے بیٹھے کسان اب دانے دانے کو ترس رہے ہیں۔
واضح رہے کہ پیاز کی فصل کا انحصار پانی پر ہوتا ہے مناسب بارش اس کے لیے نعمت کہلاتی ہے، لیکن حد سے زیادہ بارش پیاز میں پانی بھر جاتا ہے۔
بارش نے کئی فصلوں کو نقصان پہنچایا ہے ضلع اورنگ آباد کی 70 فیصد پیاز کی کھیتی پانی کی نذر ہوگئی۔
کسانوں کا کہنا ہے کہ اس فصل کا بیمہ بھی نہیں کیا جاتا اس لیے حکومت سے کسی کو مدد کی امید بھی نہیں ہے۔
