بھوک اور بے روزگاری سے عوام پریشان

ریاست مہاراشٹر کے مسلم اکثریتی شہر مالیگاؤں میں زیادہ تر عوام غریب اور مزدور طبقہ سے تعلق رکھتے ہیں، لاک ڈاؤن میں عوام کے صبر کا باندھ ٹوٹتا جارہا ہے کیونکہ رمضان کا مہینہ ہے اور آمدنی بالکل بند ہے۔

مالیگاؤں شہر کا دارومدار پاورلوم صنعت پر منحصر ہے، یہاں کے لوگ روز کماتے اور کھاتے ہیں یا پھر ہفتہ واری تنخواہ پر ان کا گزر بسر ہوتا ہے۔ ایسے حالات میں یہ لوگ کورونا سے زیادہ بھوک اور بے روزگاری سے پریشان ہیں۔

مالیگاؤں عوامی وکاس پارٹی کے صدر رضوان بیٹری والا نے بتایا کہ رائل ایجوکیشن اینڈ ویلفیئر سوسائٹی کے زیر اہتمام روزانہ شام میں پانچ سو روزہ داروں کے لیے طعام کا نظم کیا جا رہا ہے۔

ادارہ کے کارکنان کے ذریعے عصر بعد باقاعدہ گھروں تک کھانا پیکٹ میں ہر گھر میں موجود فرد کی تعداد کے مطابق پہنچا دیا جاتا ہے اور اس کی کوئی تشہیر یا فوٹو بازی نہیں کی جاتی ہے۔

رضوان بیٹری والا نے کہا کہ یہ کار خیر ماہ رمضان کے اخیر تک جاری ہے گا اور لاک ڈاؤن کی میعاد میں توسیع کی گئی تو آئندہ بھی اس کام کو انجام دینے کی کوشش جاری رہے گی۔