این آئی اے نے ممبئی پولیس کے سابق پولیس افسر سچن وازے کی موٹر سائیکل ضبط کرلیا ہے۔اس سے قبل آٹھ گاڑیاں ضبط کی تھیں۔
اتوار کی رات میں جو موٹر سائیکل ضبط کی گئی ہیں، اس سے متعلق مزید معلومات جلد ہی سامنے آئے گی۔
واضح رہے کہ مکیش امبانی کے گھر کے پاس سے ایک ایس یو وی کار میں دھماکہ خیز مواد ملنے کے معاملے کی این آئی اے جانچ کررہی ہے۔
جانچ میں سامنے آیا تھا کہ وازے کی گرفتاری کے پانچ دن بعد وازے اور اس کے ایک ساتھی کے مشترکہ بینک کھاتے سے 26.50 لاکھ روپے نکالے گئے۔
یہ جانکاری این آئی اے کی جانچ میں سامنے آئی ، جس سے متعلق سنیچر کو عدالت میں جانکاری دی گئی، یہ رقم 18 مارچ کو نکالی گئی۔
این آئی اے نے وازے کے ساتھی کا نام نہیں لیا ہے، لیکن یہ کہا کہ ممبئی کے ورسوا علاقے میں واقع ایک بینک کے لاکر سے کچھ اہم دستاویزات نکالے گئے، یہ لاکر وازے اور ان کے ایک ساتھی کے مشترکہ نام پر ہے، وازے کا ساتھی بھی اس معاملے میں ملزم ہے۔
جانچ ایجنسی نے عدالت سے کہا کہ جانچ کے دوران اسے کئی اہم سامان ملے ہیں ، جن میں لیپ ٹاپ ، ڈی وی آر(ڈیجیٹل ویڈیو ریکارڈر) ایک سی پی یو شامل ہیں، اور ان کی جانچ کرنے کی ضرورت ہے، اس کے بعد خصوصی عدالت نے وازے کی حراست 7 اپریل تک بڑھادی ہے۔
این آئی اے صنعت کار منسکھ ہیرین کی موت کے معاملے میں بھی جانچ کررہی ہے، ایجنسی نے عدالت سے کہا کہ وازے کو 4 مارچ کو موقع واردات کے پاس دیکھا گیا تھا، 5 مارچ کو تھانے میں ہیرین کی لاش ملی تھی۔
