ممبئی: ریاست مہاراشٹر کے ممبئی میں واقع دیونار سلاٹر ہاؤس میں عید الضحیٰ کے پیش نظر بڑے پیمانے پر تیاریاں جاری ہیں۔ اس بار دس ہزار اسکوائر فٹ کی ایک الگ جگہ بنائی جا رہی ہے تاکہ جگہ کی قلت کا سامنا نہ کرنا پڑے۔ دیونار سلاٹر ہاؤس کے انچارج ڈاکٹر کے پٹھان کے مطابق اس بار یہاں چھوٹے جانوروں کے ساتھ بڑے جانوروں کے لیے بھی ٹیگ بار کوڈ سسٹم کی سہولت دستیاب کی گئی ہے۔ اس سے جانوروں کی چوری کی وارداتوں پر روک لگے گی۔ اس کے ساتھ ساتھ سی سی ٹی وی سے یہاں نگرانی کی جائے گی۔ صبح 6 بجے سے 10 بجے تک یہاں داخلہ پر پابندی رہے گی کیوں کہ اس دوران صاف صفائی کی جائیگی۔
دیونار سلاٹر ہاؤس انتظامیہ نے بتایا کہ مہاراشٹر سمیت دوسری ریاستوں سے ممبئی آنے والے سبھی تاجروں کو ٹرانسپورٹ کا اجازت نامہ اپنے ہمراہ رکھنا ضروری ہے۔ آپ کو بتا دیں کہ رواں برس عید الضحیٰ کے موقع پر قربانی کیلئے آنے والے جانوروں کے لیے تاجر کی آمد جلد ہی یہاں ہوگی۔ یہاں ممبئی کے متعدد علاقوں سے جانوروں کی خریداری کے لیے لوگ آتے ہیں۔ دیونار سلاٹر ہاؤس کے افسر پٹھان نے کہا ہے کہ جانوروں کی قربانی کے لیے آن لائن سہولتیں دستیاب ہیں۔ لوگ اصول کا ضوابط پر عمل کریں تاکہ پچھلے برس کے جیسے کسی طرح کی بدنظمی نہ ہو، انہوں نے مزید کہاکہ گزشتہ برس کی طرح عوام کو پریشانیوں کا سامنا نہ کرنا پڑے۔
