ریاست مہاراشٹر کے مسلم اکثریتی شہر مالیگاؤں میں ہر برس ماہ محرم الحرام پر نکلنے والے جلوس کو پورے بھارت میں ایک الگ مقام حاصل ہے۔ محرم کے پیش نظر آج مقامی پولیس انتظامیہ اور دیگر محکموں کے ساتھ مشترکہ تنظیموں کی میٹنگ پولیس کنٹرول روم میں منعقد کی گئی۔ اس میٹنگ میں پولیس انتظامیہ کے اعلیٰ افسران کے ساتھ ساتھ دیگر محکموں کے افسران نے بھی شرکت کی۔
اس موقع پر محرم کے پیش نظر تعزیہ کمیٹی کے ذمہ داران نے شہر میں نظم و نسق اور ٹریفک سہولیات سمیت دیگر کئی اہم امور پر تبادلۂ خیال کیا۔ تعزیہ کمیٹی کے اراکین کی جانب سے مطالبہ کیا گیا کہ کارپوریشن تعزیہ لے جانے کے لیے اچھی اور سہولیات سے لیس گاڑیوں کا نظم کرے۔
اس ضمن میں کارپوریشن نے رواں برس 30 گاڑیوں کا نظم کرنے کا تیقن دیا ہے، اس کے علاوہ شہر میں نظم ونسق اور دیگر سہولیات فراہم کئے جانے کا بھی یقین دلایا گیا ہے۔
مزید پڑھیں:۔ گجرات میں اس سال بھی محرم کے جلوس پرپابندی عائد
اس سلسلے میں ضلع ایس پی سچن پاٹل نے ملت اسلامیہ کو محرم کی مبارکباد پیش کی اور کہا کہ گزشتہ برس کی طرح ہی امسال بھی کورونا گائڈ لائن پر عمل کرتے ہوئے محرم کا تہوار منائیں۔
انہوں نے کہا کہ اس وقت کورونا کا خطرہ باقی ہے اور ہمیں احتیاط کرتے ہوئے خود اور بچوں کو اس خطرناک بیماری سے بچانا ہے۔ اس لئے تہوار پر بھی کورونا گائڈ لائن پر عمل کرنا ضروری ہے۔
انہوں نے کہا کہ محرم کے پیش نظر حالات کا جائزہ لینے کے لیے پولیس انتظامیہ کے ذریعہ شہر کی اہم شاہراہوں اور مقامات پر روٹ مارچ کیا جائے گا۔ سچن پاٹل نے عوام سے اپیل کی ہے کہ تہوار امن و امان اور سادگی کے ساتھ منائیں اور انتظامیہ کا تعاون کریں۔
