مہاراشٹر کے سابق وزیراعلی دیویندر فڑنویس نے نندوربار میں ایک ریلی سے خطاب کرتے ہوئے کہا ہے کہ 'کانگریس کے ذریعہ شائع ہونے والی ایک کتاب میں ساورکر کے بارے میں ایک نازیبا مضمون لکھا ہے شیوسینا اس پر خاموش کیوں ہے؟
مہاراشٹر میں اپوزیشن و بی جے پی رہنما دیویندر فڑنویس نے شیوسینا کو لاچار قرار دیا اور کہا کہ' اگر ہم اقتدار میں ہوتے تو ساورکر کے لیے اقتدار کو لات مار کر بے اقتدار ہوجاتے'۔
فڑنویس نے مہا وکاس اگھاڑی پر نکتہ چینی کی جبکہ اس ریلی میں بڑی تعداد میں بی جے پی کارکنان موجود تھے۔
واضح رہے کہ بی جے پی نے مبینہ طور پر مدھیہ پردیش کی کانگریس یونٹ کے ذریعہ شائع ہونے والی ایک کتاب میں ساورکر کے ہم جنس پرست ہونے کے بارے میں ایک فحش مضمون لکھے ہونے کا الزام لگایا تھا۔
فڑنویس نے یہ بھی کہا کہ کل تک ماتوشری سے شیوسینا کا شیر دہاڑا کرتا تھا لیکن آج وہ ایک بلی بن کر میاؤں میاؤں کرتے ہوئے دہلی کے ماتوشری درشن کے لیے جاتی ہے۔
انھوں نے مزید کہا کہ انتخابات سے قبل بی جے پی کی اتحادی پارٹی شیوسینا نے عوام کے ساتھ دھوکہ کیا ہے اور بھارت کی تاریخ یہ بھی دیکھے گی کہ بے ایمانی سے قائم کی گئی حکومت چھ ماہ سے زائد ٹک نہیں پائی۔
دیویندر فڑنویس نے یہ بھی کہا ہے کہ ریاست میں بی جے پی کی حکومت دوبارہ قائم ہوگی۔
