نگراں وزیر اسلم شیخ نے سب سے پہلے اپنے اسمبلی حلقہ ملاڈ مغرب کے ساحلی علاقے مڈھ کا دورہ کیا اور ماہی گیروں سے ملاقات کی اس کے بعد مضافات کے کھار ڈانڈا، ماہم ساحلی پولیس اسٹیشن اور قلابہ کے ساسن ڈاک کا دورہ کرکے تباہ شدہ علاقوں کا معائنہ کیا اور ماہی گیروں کو تسلی دی۔
واضح رہے کہ پیر کے روز بحر عرب میں اٹھنے والے گردابی طوفان توکتے نے مہاراشٹر کے ساحلی علاقوں کو بری طرح سے متاثر کیا ہے، جس کا سب سے زیادہ اثر ریاست کے ماہی گیروں پر پڑا ہے۔
ممبئی شہر کے ساحلی علاقوں کا دورہ کرنے کے بعد میڈیا سے بات چیت کے دوران کابینی وزیر اسلم شیخ نے بتایا کہ اس طوفان سے ساحلی علاقوں پر واقع ماہی گیروں کی کشتیاں، جال اور مکانات کو کافی نقصان پہنچا ہے۔
محکمہ موسمیات کی جانب سے انتباہ ملنے کے بعد ماہی گیروں نے اپنی کشتیوں کو لنگر انداز کردیا تھا، مگر باوجود اس کے اس زبردست طوفان نے کشتیوں کو نقصان پہنچایا اور بیشتر کشتیاں تو پوری طرح سے تباہ ہوگئی ہیں۔ حکومت کی جانب سے ان تمام نقصانات کا پنچنامہ کیا جا رہا ہے جسے جلد از جلد مکمل کرکے تمام متاثرین کی باز آبادکاری نیز اُنہیں سرکاری معاوضہ دینے کا کام وزیر اعلیٰ اور وزیر مالیات سے تبادلہ خیال کے بعد کیا جائے گا۔
مزید پڑھیں:
توکتے طوفان: بحریہ نے بمبئی ہائی کے نزدیک سے177 افراد کو نکالا
اس موقع پر رکن اسمبلی و ممبئی کانگریس کے صدر بھائی جگتاپ، سابق رکن اسمبلی و کانگریس کے سینئر لیڈر بابا صدیقی، فشریز کمشنر اتل پیٹنے، جوائنٹ سکریٹری راجندر جادھو، ریجنل ڈپٹی کمشنر کونکن ڈویژن شری دیورے سمیت سینیئر عہدیدار موجود تھے۔
