گزشتہ دو ہفتے سے وزیراعلیٰ کے عہدے کے لیے شیوسینا اور بی جے پی کے درمیان سخت رسہ کشی جاری ہے۔
وزیراعلیٰ دیویندر فڑنویس نے گزشتہ روز ممبئی میں بی جے پی کی کور کمیٹی کی میٹنگ مکمل ہونے کے بعد آر ایس ایس سربراہ سے ناگپور پہنچ کر ملاقات کی اور ریاست کی موجودہ سیاسی صورتحال پر بات چیت کی۔
اس دوران موہن بھاگوت نے فڑنویس کو صلاح دی ہے کہ وہ شیوسینا کے ساتھ مسئلے کو حل کریں۔ اس میٹنگ کے بعد وزیراعلیٰ پھر ممبئی واپس آ گئے۔
واضح رہے کہ اس سے پہلے فڑنویس نے پیر کے روز دہلی پہنچ کر بی جے پی کے صدر اور مرکزی وزیر داخلہ امت شاہ ملاقات کی تھی لیکن اب بھی شیوسینا اپنے موقف پر بضد ہے اور اس نے ڈھائی برس کے لیے وزیراعلیٰ کا عہدہ دینے کا مطالبہ کیا ہے۔
بی جے پی اس بات کا بھی خیال رکھ رہی ہے کہ کہیں اس طرح کی صورتحال نہ نظر آئے کہ وہ شیوسینا کے سامنے جھک گئی ہے جس کی وجہ سے اب تک بی جے پی کے ایک بھی رہنما ماتوشری نہیں گئے ہیں۔ اس کے ساتھ ہی بی جے پی، شیوسینا کو وزیراعلیٰ کا عہدہ دینے کے لیے بھی تیار نہیں ہے۔
دریں اثناء بی جے پی کے چند رہنماؤں نے کہا ہے کہ 'آئندہ دو روز میں شیوسینا سے رابطہ کر کے ان کے ساتھ ہی وزیراعلیٰ کی حلف برداری کی جائے گی۔
تاہم بی جے پی کے کچھ رہنماؤں کو خدشہ ہے کہ 'اگر شیوسینا نے اپنا موقف نہیں بدلا تو دونوں پارٹیوں کے مابین تعلقات مزید کشیدہ ہوجائیں گے۔'
