مدھیہ پردیش کے وزیراعلی شیوراج سنگھ چوہان نے آج اسمبلی میں کہا کہ نئے زرعی قوانین کی وجہ سے کوئی کسان بندھوا مزدور نہیں بنے گا۔
وزیر اعلیٰ نے گورنر کے خطاب پر پیش کی گئی شکریہ تحریک میں اپوزیشن لیڈر کملناتھ کے بحث میں شامل ہونے کے دوران مداخلت کرتے ہوئے یہ بات کہی۔
دراصل کمل ناتھ نے بحث کے دوران کہا تھا کہ خطاب میں زرعی قوانین کا بھی ذکر کیا جاسکتا تھا۔ انہوں نے تینوں مرکزی زرعی قوانین کا ذکر کرتے ہوئے کہا کہ ان قوانین کی وجہ سے ہمارے کسان ’پرماننٹ بندھوا مزدور‘ بن جائیں گے۔
وزیر اعلی شیوراج سنگھ چوہان نے فوری طورپر مداخلت کرتے ہوئے کہا کہ بندھوا مزدور بننے کا سوال ہی پیدا نہیں ہوتا ہے۔ وزیراعلی نے کہا کہ وہ ہر ایک بات کا جواب دیں گے لیکن اس وقت اس لئے مداخلت کرنی پڑرہی ہے تاکہ کوئی غلط پیغام نہ جائے۔
