زندہ آدمی کو ساری رات پوسٹ مارٹم ہاوس میں رکھا گیا، صبح جب بزرگ کو پوسٹ مارٹم کے لیے لایا گیا تو ان کی سانس چل رہی تھی۔
ریاست مدھیہ پردیش کے ساگر شہر کے ایک سرکاری اسپتال میں ڈاکٹروں کی لاپرواہی نے ایک شخص کی جان لے لی۔ دراصل شہر کے سرکاری اسپتال میں ایک بزرگ شخص کو پولیس نے داخل کریا تھا لیکن حیرانی کی بات یہ ہے کہ زندہ آدمی کو ڈاکٹروں نے مردہ قرار دے دیا۔
ڈاکٹروں کے ذریعہ بزرگ کو مردہ قرار دیے جانے کے بعد اسے پوسٹ مارٹم کے لیے بھیج دیا گیا اور تعجب کی بات یہ ہے کہ زندہ آدمی کو ساری رات پوسٹ مارٹم ہاوس میں رکھا گیا، صبح جب بزرگ کو پوسٹ مارٹم کے لیے لایا گیا تو ان کی سانس چل رہی تھی۔
بزرگ کے زندہ ہونے پر ان کا علاج دوبارہ شروع کیا گیا، حالانکہ بعد میں ان کی موت واقع ہو گئی۔
پولیس کے مطابق اسپتال میں خدمت پر معمور ڈاکٹر ابھیناش سکسینا نے بزرگ کو مردہ قرار دیا تھا۔ پولیس نے معاملے میں جانچ کے بعد کارروائی کی بات کہی ہے۔
