پی ایل ایف آئی کے خود ساختہ ایریا کمانڈر سمیت تین گرفتار

ایس ڈی پی او اویناش کمار نے بتایا کہ علاقے میں کام کرنے والے ٹھیکہ داروں، پتھر کاروباریوں اور بالو کاروباریوں کو مسلسل فون پر ڈرا دھمکا کر رنگداری اور لیوی کا مطالبہ کیا جا رہا تھا جس سے ترقیاتی کام متاثر ہو رہے تھے۔

جھارکھنڈ کے ضلع ہنٹر گنج تھانہ حلقے کے ججلو بازار واقع مایاپور موڑ کے قریب پولیس نے ممنوع تنظیم پیپلس لبریشن فرنٹ آف انڈیا (پی ایل ایف آئی) کے خود ساختہ ایریا کمانڈر سمیت تین انتہا پسندوں کو گرفتار کر لیا ہے۔

ایس ڈی پی او اویناش کمار نے ہفتے کے روز یہاں پریس کانفرنس میں بتایا کہ علاقے میں کام کرنے والے ٹھیکہ داروں، پتھر کاروباریوں اور بالو کاروباریوں کو مسلسل فون پر ڈرا دھمکا کر رنگداری اور لیوی کا مطالبہ کیا جا رہا تھا جس سے ترقیاتی کام متاثر ہو رہے تھے۔ انہوں نے بتایا کہ کاروباریوں کی شکایت پر پولیس افسر کی جانب سے ایس ڈی پی او کی قیادت میں خصوصی چھاپہ مار ٹیم تشکیل دی تھی۔

مسٹر کمار نے بتایا 'ٹیم نے ہی اطلاع کی بنیاد پر خصوصی مہم چلا کر ماؤنوازوں کو ہتھیار کے ساتھ دبوچ لیا ہے۔ گرفتار ماؤنوازوں میں پی ایل ایف آئی کا ایریا کمانڈر اشیش عرف رتیش ٹائیگر جھارکھنڈ اور اجے عرف سلو اور راکیش یادو بہار کے رہنے والے ہیں۔ راکیش اور اجے کے خلاف جھارکھنڈ-بہار کے مختلف تھانوں میں کئی مجرمانہ مقدمات درج ہیں'۔

ایس ڈی پی او نے بتایا کہ گرفتار ماؤنوازوں کے پاس سے پولیس نے ایک پستول، ایک میگزین، 12 کارتوس، ایک موٹر سائیکل، مختلف کمپنیوں کے چار موبائل فون اور رنگداری وصولنے کے لیے استعمال کیے گئے سم کارڈ برآمد کیے ہیں۔