چائباسا: فاریسٹ گارڈ آفیسرکے مکان پر نکسل حملہ

ریاست جھارکھنڈ کے ضلع پچھمی سنگھ بھوم کے ڈویزن چائباسا میں نکسل وادیوں نے فاریسٹ گارڈ آفیسر کے مکان پر بم سے حملہ کر دیا جس کی وجہ سے مکان پوری طرح سے منہدم ہوگیا۔

نکسلوادیوں کی جانب سے گھر میں موجود افراد کی شدید پٹائی بھی کی گئی۔

اس کے علاوہ گھر کے باہر موجود سواری گاڑیوں، موٹر سائیکل اور اسکوٹی کو نکسیلوں نے نذر آتش کر دیا۔

مغربی سنگھ بھوم ضلع ہیڈ کوارٹر چائباسا سے متصل بارکیلا کے علاقے میں ہفتہ کی رات ساڑھے دس بجے نکسلیوں نے ہنگامہ برپا کردیا۔

کولھن فاریسٹ ڈویزن چائباسا کے تحت ستوا علاقے کے بارکیلا میں نکسلیوں نے فاریسٹ آفیسر کے گھر کو بم سے اُڑا دیا۔

یہ واقعہ ہفتے کی رات 10.30 بجے بتایا گیا ہے۔

فاریسٹ گارڈز نے بتایا کہ نکسلیوں نے پٹائی کے ساتھ ساتھ دفتر میں رکھے ہوئے تمام دستاویزات اور ٹیبل کرسیاں بھی نذر آتش کیا۔

انہوں نے کہا کہ دفتر کے احاطے میں رکھی دو چھوٹا ہاتھی گاڑی ، ایک بولیرو کار ، ایک پرانی کار ، دو موٹرسائیکلیں اور ایک اسکوٹی کو بھی نذر آتش کردیا۔

نکسلیوں نے دیہاتیوں کو ہراساں کرنے کا الزام لگا کر جنگل کے محافظوں کو زدوکوب کیا اور دھمکی دی کہ وہ دو دن کے اندر اس جگہ کو خالی کردیں۔

نکسلیوں نے پوسٹر لگا کر اپنی موجودگی ظاہر کی ہے۔

اس سے قبل بھی نکسلیوں نے علاقے میں محکمہ جنگلات کی املاک کو دھماکے سے اڑا دیا تھا۔