نیشنل کانفرنس کے جموں خطے کے صدر دیویندر سنگھ رانا نے اتوار کو جموں ایئر پورٹ پر ڈرون حملے کی مذمت کرتے ہوئے کہا کہ 'پاکستان کی طرف سے انتہا پسندی کی نئی جہت قابل مذمت اور مہذب معاشرے کے لیے ایک چیلنج ہے'۔ رانا نے اپنے ایک بیان میں کہا کہ 'اس سے پاکستان کے ارادے بے شک بے نقاب ہو چکے ہیں، خاص طور پر جب دشمن ہمسایہ نے جموں و کشمیر میں حدمتارکہ اور بین الاقوامی سرحد پر جنگ بندی نافذ کرنے کا دعوی کیا تھا'۔
رانا نے ان دھماکوں سے جانی نقصان نہ ہونے پر اطمینان کا اظہار کیا۔ رانا نے کہا کہ 'اس طرح کے انتہاپسندانہ حملوں سے جموں و کشمیر کے عوام کا حوصلہ پست نہیں ہوگا، جو پاکستان اور اس کی بدنام زمانہ خفیہ ایجنسی آئی ایس آئی کا مقابلہ کرنے کے لئے پرعزم ہیں'۔
یہ بھی پڑھیں: جموں ایئر پورٹ حملہ: ڈرون کا استعمال، تحقیقات شروع
انہوں نے کہا کہ 'انسانیت کے دشمنوں کے سامنے یہاں کے عوام متحد ہیں اور اس کا مقابلہ ہمت اور صبر کے ساتھ کیا جائے گا۔ رانا نے کہا، 'عوام انتہاپسندوں اور ان کے سرپرستوں کی سازشوں کو ناکام بنانے میں سیکورٹی فورسز کے ساتھ کھڑے ہیں۔ رانا نے پولیس کے ذریعہ آئی ای ڈی دھماکا خیز مواد کا بروقت پتہ لگانے پر بھی اطمینان کا اظہار کیا اور سیکورٹی ایجنسیوں کی تعریف کی۔
انہوں نے کہا کہ 'خطہ کے لوگوں نے ذات پات سے ہٹ کر ہمیشہ امن کا ساتھ دیا ہے'۔
