JK Political Delegation In Delhi اپوزیشن پارٹیوں کا چناو کمیشن سے ملاقات ان کی مایوسی کو ظاہر کرتا ہے، بی جے پی

بی جے پی جموں و کشمیر کے صدر رویندر رینا نے کہا کہ جموں وکشمیر کے کچھ سیاستدان ہمیشہ اقتدار میں رہنا چاہتے ہیں، آج جب ان کے پاس سرکار نہیں تو وہ پریشان ہو گئے ہیں۔

جموں:جموں وکشمیر بی جے پی کے صدر رویندر رینا نے اپوزیشن پارٹیوں کی جانب سے الیکشن کمیشن آف انڈیا کے ساتھ ملاقات کرنے پر تنقید کرتے ہوئے کہاکہ یہ اُن کی مایوسی کو ظاہر کررہا ہے۔انہوں نے کہا کہ جموں و کشمیر کے کچھ سیاستدان ہمیشہ اقتدار سے چمٹنے کی کوشش کرتے ہیں آج جب اُن کے پاس اقتدار نہیں وہ تلملا اُٹھے ہیں ۔ان باتوں کا اظہار موصوف صدر نے جموں میں نامہ نگاروں سے بات چیت کے دوران کیا۔

انہوں نے کہا کہ الیکشن کمیشن آف انڈیا نے کچھ روز قبل ہی واضح کیا تھا کہ ای سی کا ایک اعلیٰ سطحی وفد بہت جلد جموں وکشمیر کا دورہ کرکے حالات کا جائزہ لے گا۔انہوں نے بتایا کہ چناو کمیشن نے کہا کہ سراغ رساں ایجنسیوں، پولیس، فوج اور دیگر اداروں کے ساتھ حالات کا جائزہ لینے کے بعدہی اس حوالے سے کوئی فیصلہ کیا جاسکتا ہے۔

ان کے مطابق جب الیکشن کمیشن نے جموں وکشمیر کا دورہ کرنے کی بات کئی ہے تو اپوزیشن پارٹیوں کو دہلی جانے کی کیا ضرورت پڑی ۔رویندر رینا نے کہاکہ جموں وکشمیر کے کچھ سیاستدان ہمیشہ اقتدار میں رہنا چاہتے ہیں، آج جب ان کے پاس سرکار نہیں وہ پریشان ہو گئے ہیں۔

انہوں نے مزید بتایا کہ جمہوری نظام میں عوام طاقت کا سر چشمہ ہوتا ہے لیکن کچھ لوگ ہیں جو اقتدار کے بغیر ذہنی کوفت کا شکار ہو گئے اور ایسے میں وہ کبھی ایک تو کبھی دوسرا دروازہ کھٹکھٹاتے ہیں۔

واضح رہے کہ آج جموں وکشمیر کے سیاسی پارٹیوں کا ایک وفد دہلی میں اپوزیشن پارٹیوں کے رینماؤں سے ملاقات کی۔ بعد میں یہ وفد الیکشن کمشن آف انڈیا سے ملاقات کی اور اسے جموں و کشمیر میں اسمبلی انتخابات کرانے کا مطالبہ کیا ہے۔

(یو این آئی)