جموں و کشمیر کے ضلع بڈگام میں محکمہ وائلڈ لائف نے ایک چار سالہ بچی کو اپنا شکار بنانے والے تیندوے کو زندہ پکڑ لیا۔
محکمہ وائلڈ لائف کے مطابق چاڈورہ کے لولی پورہ علاقے میں گزشتہ روز ایک تیندوے کو دیکھنے کی اطلاع ملی تھی جس کے بعد وائلڈ لائف کی ٹیم نے کارروائی کرتے ہوئے تیندوے کو پکڑ لیا۔
تیندوے کے پکڑے جانے کے بعد علاقے کے لوگوں نے راحت کی سانس لی ہے۔
واضح رہے کہ ایک ہفتہ قبل بڈگام کے ہاؤسنگ کالونی اومپورہ میں تیندوے نے ایک چار سالہ معصوم بچی کو اپنا شکار بنا لیا تھا جس کے بعد سے علاقے میں ڈر کا ماحول تھا۔
مقامی لوگوں کی جانب سے انتظامیہ میں شکایت کے بعد محکمہ وائلڈ لائف تیندوے کو پکڑنے کے لیے مسلسل کارروائی کررہا تھا۔
اسی دوران محکمہ نے گزشتہ دنوں ضلع کے بیروہ علاقے سے تیندوے کے دو بچے کو ریسکیو کیا تھا اور گزشتہ شام تیندوے کو پکڑ لیا جس سے لوگوں میں راحت کی سانس لی ہے۔
