کورونا وائرس: جموں کے متعدد علاقے سیل

جموں خطے میں آج کورونا کے مزید مثبت کیسز سامنے آنے کے بعد انتطامیہ نے امفلہ جموں کشمیر بینک برانچ سمیت  تین علاقوں کو خاردار تاروں سے سیل کیا۔

جموں کا مشہور کنک منڈی بازار اور ویئر ہاوس جو کہ جموں کا سب سے بڑا تجارتی مرکز ہے، کو آج اچانک انتظامیہ کی طرف سے بند کرنے کا حکم نامہ جاری کیا گیا۔

اطلاعات کے مطابق کنک منڈی بازار میں ایک مزدور کا ٹیسٹ مثبت سامنے آیا ہے جس کے بعد پورے کنک منڈی بازار کو بند کرنے کا فیصلہ کیا گیا۔ وہیں جموں کا تجارتی مرکز ویئر ہاوس کو بھی بند کیا گیا جہاں پر دو افراد کو کورونا وائرس سے متاثر پایا گیا ہے۔جموں کشمیر بینک کی امفلہ برانچ میں کام کر رہے ایک ملازم کے بیٹے کا ٹیسٹ مثبت سامنے آنے کے بعد بینک کو فوری طور بند کیا گیا۔ واضح رہے کہ جموں و کشمیر میں کووڈ 19 میں مثبت پائے گئے افراد کی تعداد 2400 سے زاید پہنچ گئی ہے جبکہ مرنے والوں کی تعداد 28 ہوگئی ہے۔