کشمیر: کورونا کے نئے کیسز سے عوام میں تشویش

جنوبی کشمیر کے ترال علاقے میں کورونا وائرس کے کیسز میں گزشتہ روز زبردست اضافہ ہوا ہے اور کل بودر و محلہ ترال ریڈ زون علاقے سے کورونا وائرس کے گیارہ مثبت کیسز سامنے آنے کے بعد عوام میں مزید تشویش پھیل گئی ہے۔

مزید دو کیس ترال کے سیموہ اور املر نامی دیہات سے درج کیے گئے ہیں۔ اس طرح ترال میں اب تک کورونا وائرس کے 43 مریض سامنے آگئے ہیں۔

مزید کیسوں کے فوراً بعد سرویلنس ٹیموں کے ذریعے علاقے میں سیمپلنگ کا عمل دن بھر جاری رہا جس دوران ساٹھ کے قریب افراد کے سیمپلس لیے گیے جبکہ میونسپل کمیٹی ترال کے ملازمین نے علاقے میں جراثیم کش ادویات کا چھڑکاؤ کیا۔

میڈیکل آفیسر سب ڈسٹرکٹ اسپتال ترال ڈاکٹر ظہور نے میڈیا کو بتایا کہ اب تک علاقے میں دو ہزار کے قریب سیمپلس لیے گیے ہیں جن میں اکثر منفی ثابت ہوئے ہیں۔ تاہم مثبت افراد سے رابطے میں آئے متعدد افراد کو قرنطینہ میں رکھا گیا ہے۔