جموں میں سکھوں کے چھٹے گرو ہرگوبند سنگھ کا یوم پیدائش انتہائی جوش و خروش کے ساتھ منایا گیا۔ جمعہ کے روز صبح سے ہی سکھ برادری کے عقیدت مندوں کا گردواروں پر تانتا بندھا رہا۔
بیشتر عقیدت مند کورونا وائرس سے بچاﺅ کے ایس او پیز اور احتیاطی تدابیر پر سختی سے عمل کرتے ہوئے نظر آئے۔ جموں میں گرو ہرگوبند سنگھ کے جنم دن کے سلسلے میں سب سے بڑی تقریب سرمائی دارالحکومت جموں میں گردوارہ ”بی بی چاند کور“میں منعقد ہوئی۔ جو کہ رگوناتھ مندر کے نزدیک میں ہی واقع ہیں۔
سکھ عقیدت مندوں کی بڑی تعداد جس میں خواتین، بوڑھے اور بچوں کی خاصی تعداد شامل تھیں، نے صبح سویرے سے ہی گردوارے پر حاضری دینا شروع کی تھی۔
اس موقع پر سکھ عقیدت مندوں کے لئے خصوصی لنگر کا بھی اہتمام کیا گیا تھا۔ گردوارے کے داخلی دروازے پر سینیٹائزر اور ماسک رکھا گیا تھا اور ہر عقیدت مند کے جسم کا درجہ حرارت چیک کیا جا رہا تھا۔ داخلی دروازے پر رضاکار تعینات کئے گئے تھے جو عقیدت مندوں کو ایک ایک کر کے اندر جانے کی اجازت دے رہے تھے۔
یہ بھی پڑھیں: بجبہاڑہ: بابا نصیب الدین کے مزار پر دمبالی تقریب کا انعقاد
جموں کے علاوہ دوسرے اضلاع بشمول ادھم پور، کٹھوعہ اور سانبہ میں بھی خصوصی تقریبات کا اہتمام کیا گیا ہے۔
