ڈپٹی کمشنر سامبا کی ہدایت پر سب ڈویژنل مجسٹریٹ کوتوال کی قیادت میں ایک ٹیم نے آج صبح ضلع سامبا میں 'نیو لائٹ نامی ہائر سیکنڈری اسکول پر چھاپہ مارا اور اسکول کو سرکاری حکمنامے کی خلاف ورزی کرنے کی پاداش میں بند کر دیا اور ان کے خلاف ضابطے کے تحت کارروائی انجام دی۔
کورونا وائرس وبا کی وجہ سے جہاں گزشتہ دنوں انتظامیہ نے تمام سرکاری اور نجی اسکولوں کو بند کرنے کے احکامات صادر کئے، وہیں آج ضلع سامبا میں محکمہ تعلیم کے حکمنامے کی خلاف ورزی کرنے والے تعلیمی ادارے کے خلاف کارروائی انجام دی گئی۔
محکمہ تعلیم نے ضلع کے سرکاری اور نجی اسکولوں کے ذمہ داران کو ہدایت دی ہے کہ وہ حکمنامے کا پاس و لحاظ رکھے بصورت دیگر خلاف ورزی کرنے والوں کے خلاف سخت کارروائی کی جائے گی۔
واضح رہے کہ جموں و کشمیر انتظامیہ کی جانب سے جاری کردہ آج کے میڈیا بلٹین کے مطابق جموں و کشمیر میں دو افراد کے کورونا وائرس کے ٹیسٹ مثبت اور 176 افراد نے نگرانی کی مدت مکمل کی جبکہ مرکزی وزارت صحت نے جموں و کشمیر میں تیسرے کیس کی بھی تصدیق کی ہے۔
