ریاست ہریانہ کے ضلع یمنا نگر کے جگادھری صدر پولیس اسٹیشن کے گاؤں کاٹھ والا سے ایک سنگین نوعیت کا معاملہ سامنے آیا ہے جہاں ایک لڑکے نے خودکشی کرلی جب کہ اگلے ہی دن اس کی بہن کی شادی تھی، لڑکی کی شادی کو مجبوری کی وجہ سے آگے نہیں بڑھایا جا سکتا تھا۔
اس لیے بارات آنے کے باوجود لوگ خوش ہونے کے بجائے غمگین تھے۔ بھائی کی لاش مردہ خانہ میں پڑی تھی اور بہن کی شادی ہو رہی تھی۔ یہ منظر دیکھ کر وہاں موجود سبھی لوگ رو پڑے۔
اہلِ خانہ کا الزام ہے کہ گاؤں کے کچھ لڑکے شادی کرنے والی لڑکی کو ہراساں کررہے تھے اور شادی میں رکاوٹیں بھی ڈال رہے تھے۔ یہاں تک کہ ان شرپسندوں نے لڑکی کے سسرال میں بھی فون کرکے اس شادی کو توڑنے کی کوشش کی تھی۔
بتایا جاتا ہے کہ متوفی دیپانشو ان تمام چیزوں سے بہت پریشان تھا اور شادی سے ایک دن پہلے ہی اس نے موت کو گلے لگا لیا۔
وہیں خودکشی کی اطلاع ملتے ہی پولیس موقع پر پہنچ گئی اور لاش کو اپنے قبضے میں لے کر پوسٹ مارٹم کے لئے بھیج دیا۔
اہلِ خانہ نے پولیس کو دی گئی شکایت میں بتایا کہ گاؤں کے کچھ نوجوان دیپانشو کی بہن کو اکثر ہراساں کرتے تھے، جس کے خلاف انہوں نے مقامی پولیس کو شکایت بھی کی تھی اور پولیس نے کارروائی کرتے ہوئے انہیں جیل بھی بھیج دیا تھا۔
لیکن جیل سے باہر آنے کے بعد انہی نوجوانوں نے ایک بار پھر دیپانشو کی بہن کو بدنام کرنا شروع کردیا۔
پولیس افسر نے بتایا کہ انہیں اطلاع ملی تھی کہ گاؤں کے کچھ نوجوان ایک لڑکی کی شادی میں رکاوٹیں ڈالنے کی کوششیں کر رہے ہیں، جس کی وجہ سے دیپانشو نام کے نوجوان نے خودکشی کرلی ہے۔
فی الحال پولیس معاملے کی تحقیقات کر رہی ہے اور بدمعاشوں کو گرفتار کرنے کی کوشش کر رہی ہے۔
