ضلع گاندربل کے گنگرہامہ علاقے میں نالہ سندھ سے روزگار کمانے والے مقامی افراد نے ضلع انتظامیہ کے خلاف جم کر احتجاج کیا۔
عوام کا کہنا ہے 'احتجاجی مظاہرین میں شامل مقامی لوگ دن بھر محنت مزدوری کرکے نالہ سندھ سے تعمیراتی مواد نکال کر اپنا اور اہل خانہ کا پیٹ پالتے تھے تاہم ضلع انتظامیہ کی جانب سے نالہ سندھ سے تعمیراتی مواد ٹھیکہ پر دینے سے ہزاروں کی تعداد میں مقامی افراد بے روزگار ہو رہے ہیں.
احتجاج میں موجود لوگوں نے مانگ کی کہ نالہ سندھ کا ٹینڈر واپس لیا جائے۔ نالہ سندھ کو آج تک کسی نے لیز پر نہیں دیا مگر پچھلی حکومت نے نالہ سندھ کو ٹینڈر کے ذریعے ٹھیکیداروں کو لیز پر دینے کے احکامات جاری کئے۔ جس کے نتیجے میں گاندربل کے مختلف علاقوں سے تعلق رکھنے والے مزدوروں کا روزگار ختم ہوگیا۔
مقامی مزدوروں نے کہا 'ہم نالہ سندھ سے اپنا اور اپنے اہل خانہ کا پیٹ پالتے تھے مگر حکومت نے جب سے ٹھیکیداروں کے حوالے کیا تب سے ہم لوگ فاقہ کشی کے شکار ہوگئے ہیں۔ اب ہم ضلع ترقیاتی کمشنر اور ایس ایس پی گاندربل سے التجاء کرتے ہیں کہ ٹینڈر کا فیصلہ واپس لیں تاکہ ہمارا روزگار بحال ہو'۔
