جموں و کشمیر کے گندو علاقہ میں ٹیلنٹ کی کمی نہیں ہے لیکن بنیادی سہولیات کے فقدان کی وجہ سے باصلاحیت کھلاڑیوں کا مستقبل صرف گراؤنڈ نہ ہونے کی وجہ سے ختم ہو گیا۔
اگرچہ موجودہ وقت میں حکومتی سطح پر کھیل کود کو فروغ دینے کے لیے بڑے پیمانے پر مہم چلائی جا رہی ہے لیکن اُن اسکیم کا زمینی سطح پر تاحال کوئی اثر دکھائی نہیں دے رہا ہے اور حکومت کی طرف سے پنچایت سطح پر کھیل کے میدان تعمیر کرنے کے دعوے وفا نہیں ہو رہے ہیں۔
گندو کے عارف راتھر نے گراؤنڈ نا ہونے پر ناراضگی کا اظہار کرتے ہوئے کہا کہ بھلیسہ میں ہُنر مند کھلاڑیوں کی کمی نہیں ہے لیکن اُس ٹیلنٹ کو نکھارنے کی ضرورت ہے جس کے لیے بنیادی سہولیات کا ہونا لازمی ہے۔
گندو بھلیسہ سے نکل کر متھن منہاس نے عالمی سطح پر آئی پی ایل جیسے معروف ٹورنامنٹ میں علاقہ کا نام روشن کیا اور ساتھ ہی ایک ایسے سپوت کو بھی جنم دیا جس نے ملک کی نمائندگی کی۔
بھلیسہ کے چین سنگھ نے شوٹر میں اپنا نام کمایا جنہوں نے نا صرف ریاست جموں و کشمیر بلکہ ملک کا نام بھی روشن کیا۔ تاہم بد قسمتی سے اُن کے آبائی گاؤں کے بچّے گراونڈ کے لیے ترس رہے ہیں۔
اُنہوں نے حکومت سے مطالبہ کیا کہ بھلیسہ گندو میں ایک منی اسٹیڈیم کو فوری طور تعمیر کرنے کی منظوری دی جائے۔
