ترکمان گیٹ پر یوگیندر یادو نے کہا کہ ابھی وقت ہے آواز اور پکار سن لو، ورنہ 100 شاہین باغ اور کھڑے ہو جائیں گے۔
احتجاج میں شریک خواتین سے خطاب کرتے ہوئے یوگیندر یادو نے کہا کہ آج پورے ملک میں سیکڑوں شاہین باغ ہیں۔ دہلی ہی نہیں بلکہ پٹنہ اور کولکاتہ میں بھی ایسے متعدد شاہین باغ بن چکے ہیں۔
انہوں نے کہا کہ اوکھلا کے شاہین باغ کو دبانے اور بدنام کرنے کی بھرپور کوشش کی گئی اور سوچا تھا کہ اسے بدنام کر کے معاملہ ختم کر دیا جائےگا لیکن ایک شاہین باغ کو دبانے کے چکر میں 100 شاہین باغ اور بن گئے۔یوگیندر یادو نے کہا کہ وزیر اعظم اور وزیر داخلہ سے ان کا کہنا ہے کہ وہ ابھی بھی یہ پکار سن لیں۔
انہوں نے مرکزی حکومت کو مشورہ دیتے ہوئے کہا کہ معاملہ راستے میں ہی حل ہو جائےگا زیادہ قیمت نہیں ادا کرنی ہوگی۔ انہوں نے کہا کہ پورے ملک میں خواتین احتجاجی دھرنے پر ہیں اور وہ سی اے اے کے بارے میں کہ رہی ہیں کہ یہ انہیں منظور نہیں ہے۔
یوگیندر یادو نے مثال دے کر سمجھاتے ہوئے کہا کہ یہ قانون شہریوں میں تفریق پیدا کرنے اور کسی کو مالک اور کسی کو کرائے دار بنانے کی تجویز ہے۔
انہوں نے کہا کہ جس جس کے آبا ؤ اجداد اس ملک کی مٹی میں دفن ہیں وہ سب مکان مالک ہیں کرائے دار نہیں ہیں۔
