موج پور میں حالات کشیدہ

شمال مشرقی دہلی کے موج پور علاقہ میں شہریت ترمیمی قانون کے خلاف مظاہرین اور اس کی حمایت میں آئے لوگوں کے درمیان پتھر بازی ہوئی ہے جس کی وجہ سے یہاں پر فساد جیسے حالات ہیں۔

دارالحکومت دہلی کے موج پور علاقہ میں ماحول کافی گرم ہے اور فساد جیسے حالات ہیں۔ اس دوران شہریت ترمیمی قانون کے خلاف مظاہرین اور حمایت میں آئے لوگوں کے درمیان زبردست پتھر بازی ہوئی ہے۔

اس دوران ای ٹی وی بھارت کے نمائندے نے موج پور میں جاکر حالات کا جائزہ لیا اور دیکھا کہ دونوں جانب سے پتھر بازی اور ہنگامہ آرائی کی جا رہی ہے۔

اطلاعات کے مطابق گوکل پوری تھانہ کے اے سی پی رتن لال جن کی عمر 40 برس تھی وہ اس پتھر بازی میں ہلاک ہو گئے ہیں۔

خبر یہ بھی ہے کہ بھجن پورا میں دو گھروں کو شرپسندوں نے نذر آتش کر دیا ہے۔ حالانکہ ابھی تک اس کی تصدیق نہیں کی جا سکی ہے، تاہم آدھا درجن گاڑیاں جل کر خاک ہو چکی ہیں۔ پتھر بازی کے بعد پولیس ان کو قابو میں لانے کے لیے لاٹھی چارج اور آنسو گیس کا استعمال کر رہی ہے۔